• news (1)
  • news (2)
  • news (3)
  • news (4)
  • news (5)
  • news (6)
  • news (7)
  • news (8)
  • news (9)

সাহিত্যৰ সৈতে কাগজ কলমৰ নিকট আৰু নিবিড় সম্পৰ্কক কোনেও অস্বীকাৰ কৰিব নোৱাৰে। এখিলা শুদ্ধ বগা কাগজত কলমেৰে লিখা এজন লেখকৰ অনুভৱবোৰ যেতিয়া কোনো আলোচনীৰ পৃষ্ঠাত ছপা ৰূপ লাভ কৰে, তেতিয়া লেখকজনে সমগ্ৰ সত্ত্বাত যি পুলক লাভ কৰে সেয়া কেৱল অনুভৱহে কৰিব পাৰি। কিন্তু সময়ৰ দ্ৰুত পৰিৱৰ্তনে আমাক কিছুমান কথা নতুনকৈ ভাবিবলৈ বাধ্য কৰায়। আমি সকলো একবিংশ শতিকাৰ দ্বিতীয়াৰ্ধত সাম্প্ৰতিক সময়ছোৱাত বিজ্ঞান আৰু প্ৰযুক্তিৰ দ্ৰুত বিকাশে বিভিন্ন ক্ষেত্ৰত সূচনা কৰা আমূল পৰিৱৰ্তনৰ সৈতে প্ৰত্যক্ষ আৰু পৰোক্ষভাৱে পৰিচিত। সম্প্ৰতি আমি প্ৰত্যেকেই ইণ্টাৰনেটৰ যুগৰ মানুহ। অসমীয়া ভাষা সাহিত্যৰ ক্ষেত্ৰখনতো ইণ্টাৰনেটে এক ইতিবাচক প্ৰভাৱ বিস্তাৰ কৰিবলৈ সক্ষম হৈছে। অসমীয়া ভাষা সাহিত্যৰ কাগজ কলমৰ যুগৰ সৈতে সংযোজিত হৈছে ভাষা সাহিত্যৰ এক ই-বিপ্লৱৰ। অসমীয়া ভাষা সাহিত্যৰ প্ৰেক্ষাপটত পলমকৈ সূচনা হোৱা এই বিপ্লৱৰ অনুপাতে ই-বিশ্বত অসমীয়া ভাষা সাহিত্যৰ সমল মন্থৰ গতিৰে হলেও যথেষ্ট বৃদ্ধি পাইছে। ইয়াৰ অন্তৰালত অন্তৰ্নিহিত হৈ আছে কিছুসংখ্যক উৎসাহী আৰু কৰ্মঠ যুৱক যুৱতীৰ অক্লান্ত প্ৰয়াস। ছপা মাধ্যমৰ সমান্তৰালভাৱে অসমীয়া ভাষা সাহিত্যক ই-বিশ্বত সবল ৰূপত প্ৰতিষ্ঠা কৰাৰ নিমিত্তে সূচনা এই ই-বিপ্লৱক বিভিন্নজনে অসমীয়া ভাষা সাহিত্যৰ ই জোনাকী যুগ বুলি অভিহিত কৰিছে।

অসমীয়া সাহিত্যৰ ই-জোনাকী যুগক সমৃদ্ধ কৰা ই-আলোচনীসমূহৰ ভিতৰত প্ৰথমেই নাম ল’ব লাগিব এনাজৰী ডট কমৰ।অসমত যদি এনাজৰী ডট্ কমৰ নাম নুশুনা অসমীয়া শিক্ষিত ব্যক্তি কোনোবা আছে, তেন্তে ইয়াতকৈ দুৰ্ভাগ্যজনক কথা অসমবাসীৰ বাবে একো হ’ব নোৱাৰে। সময়ৰ পৰিৱৰ্তনৰ সৈতে একাত্ম হৈ সমসাময়িক পৰিস্থিতিৰ খবৰ ৰখাসকলে এই কথা জানে আৰু যিসকল অসমীয়া শিক্ষিত ব্যক্তি এই সম্পৰ্কে অজ্ঞাত তেওঁলোকেও জনা উচিত যে ২০১০ চনৰ ১৩ মাৰ্চত গুৱাহাটী প্ৰেছ ক্লাবত অসমৰ বিশিষ্ট সাহিত্যিক নিৰুপমা বৰগোহাঞিয়ে শুভ উন্মোচন কৰা এনাজৰী হৈছে প্ৰথম অসমীয়া অনলাইন আলোচনী তথা ই-জোনাকী যুগৰ অসমীয়া ভাষা-সাহিত্য আৰু সংস্কৃতিৰ ই-বিল্পৱৰ বাটকটীয়াস্বৰূপ। অসমৰ সুযোগ্য সন্তান হিমজ্যোতি তালুকদাৰৰ সম্পাদনা আৰু পৰিকল্পনাৰ ফচল এনাজৰী সম্প্ৰতি এখন দ্বি-ভাষিক অসমীয়া ই-আলোচনীয়ে নহয়, এনাজৰী এক বহুমুখী প্ৰকপল্প যিটো প্ৰকল্পই ২০১৩ চনৰ অক্টোবৰ মাহত শ্ৰীলংকাৰ কলম্বোত আয়োজিত ৱৰ্ল্ড ছামিট এৱাৰ্ড ২০১৩ অনুষ্ঠানত ই-কণ্টেণ্ট আৰু ক্রিয়েটিভিটি শাখাত বিজয়ী সন্মান লাভ কৰিছিল। উল্লেখযোগ্য যে এই আন্তৰ্জাতিক পৰ্যায়ৰ সন্মিলনখনত এনাজৰীয়ে ভাৰতক প্ৰতিনিধিত্ব কৰিছিল আৰু এনাজৰীৰ এই সাফল্য অসম আৰু উত্তৰ-পূব ভাৰতৰ বাবে গৌৰৱৰ কাৰণ। কিন্তু দুখজনক কথাটো হ’ল এই সফলতা সম্পৰ্কে গৰিষ্ঠসংখ্যক অসমীয়া অৱগত নহ’ল।অসমীয়া আৰু ইংৰাজী দুয়োটা ভাষাতে অসম সংক্রান্তীয় পৰ্যাপ্ত পৰিমাণৰ সমল লাভ কৰাৰ এক উপযুক্ত ই-মাধ্যম হিচাপে এনাজৰীক গঢ়ি তোলাটোৱেই হৈছে আলোচনীখনৰ অন্যতম উদ্দেশ্য। অসমীয়া সাহিত্যৰাজি ইংৰাজীলৈ অনুবাদ কৰা, বিভিন্ন শিক্ষা প্ৰতিষ্ঠানত ইউনিক’ড কৰ্মশালা আয়োজন কৰা ইত্যাদি বিভিন্ন কাৰ্যপন্থাৰে অসমীয়া ভাষা-সাহিত্যলৈ অমূল্য অৱদান আগবঢ়াই অহা এনাজৰীৰ সৈতে জড়িত হৈ আছে এদল স্বেচ্ছাসেৱী অসমীয়া যুৱক-যুৱতীৰ অক্লান্ত পৰিশ্ৰম। ২০১০ ৰ পৰা ২০১৩ ৰ তিনিবছৰীয়া পৰিক্রমাত এনাজৰীয়ে কেইবাটাও সফলতা বুটলিবলৈ সক্ষম হৈছে। ‘ই নৰ্থ ইষ্ট বঁটা’ৰ জুৰীৰ বিশেষ বঁটাৰে সন্মানিত হোৱা আলোচনীখন ‘মন্থন ছাউথ এছিয়া আৰু এছিয়া পেচিফিক ২০১২ বঁটা’ লাভেৰে অসমলৈ সুনাম কঢ়িয়াই আনিছিল। ২০১৩ ৰ ৱৰ্ল্ড ছামিট এৱাৰ্ডেৰে এনাজৰীয়ে লাভ কৰিবলৈ সক্ষম হ’ল এক আন্তৰ্জাতিক স্বীকৃতি। এনাজৰী ডট্ কমৰ অধীনত সম্প্ৰতি বিভিন্ন প্ৰকল্পৰ কাম চলি আছে। ‘লিপান্তৰ প্ৰকল্প’ৰ অধীনত অনুবাদ কৰ্মদলৰ সহায়ত অসমীয়া সাহিত্যৰ ইংৰাজী অনুবাদৰ কাম আৰু ইউনিক’ড কৰ্মদলৰ কাম চলি আছে। সমান্তৰালভাৱে ই-বিশ্বত অসমীয়া গীত-মাত, আলোকচিত্ৰ, পুৰণি অসমীয়া গ্ৰন্থৰ ডিজিটেল ৰূপৰ সংৰক্ষণৰ কাম অব্যাহত আছে। এনাজৰীৰ অভিলাষী আঁচনি সাহিত্যৰথী ডট্ কমৰত সংৰক্ষিত হৈছে সাহিত্যৰথী লক্ষ্মীনাথ বেজবৰুৱাদেৱৰ সাহিত্য আৰু জীৱন পৰিক্রমাৰ ডিজিটেল ৰূপ। সুৰৰ এনাজৰী ডট্ ইনফ’ অন্তৰ্ভুক্ত হৈছে তেৰশৰো অধিক পুৰণি গীত।

ফেচবুকত ভাষা-সাহিত্যৰ ইতিবাচক চিন্তাৰ মঞ্চ ‘অসমীয়াত কথা-বতৰা’ গোটটো কিছুসংখ্যক সাহিত্যনুৰাগীৰ এক ইতিবাচক প্ৰয়াস। ইণ্টাৰনেটত অসমীয়া ভাষা-সাহিত্যৰ চৰ্চা আৰু অসমীয়া ভাষাক বিশ্বমুখী কৰাৰ এক প্ৰচেষ্টা হিচাপে ফেচবুকৰ ‘অসমীয়াত কথা-বতৰা’ গোটটোত প্ৰকাশিত নিৰ্বাচিত লেখাসমূহৰ লগতে অন্যান্য বহিঃউৎসৰ পৰা সংগ্ৰহ কৰা লেখাসমূহৰ প্ৰকাশৰ এক মঞ্চ হিচাপে ২০১১ চনৰ জুলাই মাহৰ পৰা ‘সাহিত্য ডট্ অৰ্গ’ নামৰ অসমীয়া ই-আলোচনীখনৰ প্ৰকাশ কৰা হৈছে। প্ৰতি ইংৰাজী মাহৰ পোন্ধৰ তাৰিখে প্ৰকাশ পোৱা আলোচনীখনৰ জুলাই ২০১১ ৰ পৰা ছেম্বেৰ ২০১২ লৈ এক স্বতন্ত্ৰ অনুষ্ঠান তথা ৱেবছাইট হিচাপে ‘অসমীয়াত কথা-বতৰা’ গোটৰ পৰা প্ৰকাশ হৈছিল। অক্টোবৰ, ২০১২ ৰ পৰা ইয়াক ‘ভাষা-সাহিত্য সন্মিলনী, অসম’ নামৰ সংস্থাটিৰ অন্তৰ্ভুক্ত কৰা হয় আৰু ইয়াক সংস্থাৰ মাহেকীয়া মুখপত্ৰ হিচাপে ঘোষণা কৰা হয়। প্ৰতিমাহে ‘অসমীয়াত কথা-বতৰা’ নামৰ গোটটিৰ সক্রিয় সদস্যসকলৰ মাজৰ পৰা নিৰ্বাচিত এজনে আলোচনীখনৰ সম্পাদনা কৰে য’ত অসমৰ কেইবাজনো প্ৰতিষ্ঠিত আৰু নবীন লেখকে সাহিত্যৰ চৰ্চা কৰি আহিছে। ২০১৩ চনৰ ফেব্ৰুৱাৰী সংখ্যাৰ পৰা প্ৰকাশ পাই অহা অসমীয়া সাহিত্যৰ মহীৰূহ নলিনীধৰ ভট্টাচাৰ্যৰ আত্মজীৱনী ‘মৌ-সনা সোঁৱৰণী’ হৈছে অসমীয়া ভাষাত ইণ্টাৰনেটত প্ৰকাশিত প্ৰথম অসমীয়া আত্মজীৱনী। অসমীয়া ভাষা-সাহিত্য-সংস্কৃতিৰ সৃষ্টিৰাজিক ইউনিক’ডলৈ ৰূপান্তৰণৰ আঁচনিৰ জৰিয়তে ইতিমধ্যে শ্ৰীমন্ত শংকৰদেৱৰ ‘কীৰ্ত্তন পুথি’ আৰু মাধৱদেৱৰ বিৰচিত ‘নামঘোষা’ৰ ইউনিক’ড ৰূপান্তৰণেৰে ‘সাহিত্য’ৰ সংগ্ৰহালয় ইতিমধ্যে সমৃদ্ধ হৈছে। মুঠৰ ওপৰত, সাহিত্য ডট্ অৰ্গ হৈছে অসমীয়া ভাষাত ইণ্টাৰনেটত ভাষা-সাহিত্যৰ চৰ্চাৰ এখন মুকলি মঞ্চ, এক বৌদ্ধিক আন্দোলন। সাহিত্য ডট্ অৰ্গত প্ৰকাশিত নিৰ্বাচিত কিছুসংখ্যক লেখাৰে অতিথি সম্পাদক দিগন্ত ওজাৰ সম্পাদনাত ‘অসমীয়া সাহিত্যৰ ই-সঁফুৰা’ নামৰ এখন গ্ৰন্থ ছপা আকাৰেও ইতিমধ্যে প্ৰকাশ হৈছে।এনাজৰী ডট্ কম, সাহিত্য ডট্ অৰ্গৰ উপৰিও ই-বিশ্বত কেইবাখনো অসমীয়া ই-আলোচনী উপলব্ধ। তদুপৰি ভালেসংখ্যক অসমীয়া ব্যক্তিৰ ব্লগেও এই ই-বিল্পৱক যথেষ্ট অৰিহণা আগবঢ়াই আহিছে। অসমীয়া ভাষা-সাহিত্য-সংস্কৃতিক ই-দৰবাৰত প্ৰতিষ্ঠা কৰাৰ ক্ষেত্ৰত এই ব্লগসমূহৰ ভূমিকা কোনোপধ্যে কম নহয়।

অসমীয়া ই-সাহিত্যক আৰু অধিক সমৃদ্ধ কৰাৰ বাবে ভাষা আৰু সাহিত্যৰে জড়িত অসমৰ বিভিন্ন অনুষ্ঠান-প্ৰতিষ্ঠানে সক্রিয় ভূমিকা গ্ৰহণ কৰা উচিত। এইক্ষেত্ৰত অসম সাহিত্য সভাৰ দৰে জাতীয় অনুষ্ঠানৰনেতৃত্বৰ খুবেই প্ৰয়োজন। প্ৰযুক্তি আৰু বিজ্ঞানৰ এই সাম্প্ৰতিক প্ৰেক্ষাপটত অসম সাহিত্য সভাই আন্তঃৰাষ্টীয় স্তৰৰ ৱেবছাইট নিৰ্মাণেৰে অসমীয়া ভাষা-সাহিত্যক বিশ্বমুখী কৰি তোলাত অগ্ৰণী ভূমিকা গ্ৰহণ কৰা উচিত। এনাজৰীৰ উদ্যোগত গঠিত সাহিত্যৰথী ডট্ কমৰ দৰে ৱেবছাইট নিৰ্মাণেৰে অসমৰ বৰেণ্য সাহিত্যিকসকলৰ সাহিত্যৰাজিৰ ডিজিটেল ৰূপ প্ৰদানৰ যদি ব্যৱস্থা গ্ৰহণ কৰা হয় ই ই-সাহিত্যক সমৃদ্ধিশালী কৰিব। অসম চৰকাৰেও যদি চৰকাৰী পৃষ্ঠপোষকতাত এনে পদক্ষেপ কিছুমান গ্ৰহণ কৰে, তেন্তে আন্তৰ্জাতিক প্ৰেক্ষাপটত অসমৰ সাহিত্য-সমাজ-সংস্কৃতিৰ সঠিক উপস্থাপন কৰিব পৰা যাব। বিভিন্ন প্ৰকল্প হাতত লৈ অসমীয়া বৰেণ্য সাহিত্যৰাজি অনুবাদ কৰি ইণ্টাৰনেটত উপলব্ধ কৰাৰ ব্যৱস্থা কৰাটো খুবেই প্ৰয়োজন। ছপা সাহিত্যৰ দৰে অসমীয়া ই-সাহিত্যকো সাহিত্য সভাই স্বীকৃতি প্ৰদানেৰে ইয়াৰ বিকাশৰ বাবে এটা পৃথক কোষ প্ৰতিষ্ঠা কৰিব লাগে। অসমীয়া ভাষা-সাহিত্যৰ এই ই-বিল্পৱ সম্পৰ্কে সজাগতা সৃষ্টিৰ লগতে ইণ্টাৰনেটত অসমীয়া ভাষাক প্ৰতিষ্ঠা কৰাৰ বাবে মহাবিদ্যালয়, বিশ্ববিদ্যালয়সমূহেও কিছুমান পদক্ষেপ গ্ৰহণ কৰিব পাৰে। যদি মহাবিদ্যালয়, বিশ্ববিদ্যালয়ৰ আলোচনীসমূহক ছপাৰ লগতে ই-আলোচনীৰূপে প্ৰকাশৰ ব্যৱস্থা কৰা হয়, তেন্তে ই অসমীয়া ই-সাহিত্যত এক শক্তিশালী সংযোজন হ’ব। তদুপৰি ইণ্টাৰনেটত অসমীয়া ভাষা, ইউনিক’ড আদি সম্পৰ্কীয় কৰ্মশালাৰ আয়োজন কৰা উচিত।

সাম্প্ৰতিক সময়ত পৃথিৱীৰ উন্নত দেশসমূহত বিভিন্ন ই-প্ৰকল্পৰে ভাষা-সাহিত্য আৰু সংস্কৃতিৰ এই ই-বিল্পৱ অতি সক্রিয় ৰূপত পৰিলক্ষিত হৈছে। তুলনামূলকভাৱে পলমকৈ অসম মুলুকত আৰম্ভ হোৱা এই সাহিত্যৰ ই-বিল্পৱৰ অধিক বিস্তাৰ, বিকাশ আৰু প্ৰসাৰৰ বাবে শিক্ষিত জনসাধাৰণ আগবাঢ়ি অহাৰ সময় হ’ল, অন্যথা আমাক পৃথিৱীয়ে বহু দূৰত এৰি থৈ গুচি যাব। আমি আশাবাদী, সম্প্ৰতি অসমত আৰম্ভ হোৱা এই বিল্পৱ অধিক বিস্তাৰ হ’ব আৰু অসমীয়া সাহিত্যৰ এই ই-বিল্পৱ অধিক সমৃদ্ধ হ’ব।কৃতজ্ঞতা স্বীকাৰ-১।অসমীয়া ৱিকিপিডিয়া,xahitya.org,enajori.com,মই আৰু মোৰ পৃথিৱী (www.himjyoti.com),বিশ্ব সন্মিলনক ‘এনাজৰী’ৰ বান্ধোন - হিমজ্যোতি তালুকদাৰ, সাতসৰী, ডিচেম্বৰ,২০১৩।